ابو ذيات عراقية

تشب بضلوع صدري يامناره
وليمته انطره يومناره
الك ثارات قبة يو مناره
لو باجي المصايب ياشفية؟


وحك من كون الاكوان وابسط
انه اسهل من نسيم الروح وابسط
جنت املك مخدة صوف وابساط
الاجوني فرهدو ذني من اديه

بعدك كمت اسوي اللوح ويبات
ولا اخلي دليلي يهين ويبات
الحزن وياي طول الليل ويبات
بفراشي ويسولفلي عليه

بنص گلبي لگعد حُبك وبيته ........ أخلي
وبمرض فرگاك گَلبي وبيته ......... مرضته
گلبي يعتبرك موطنه وناسه وبيته ........ البيت
والي يظل بلا وطن كل عمره أذيه


رخه گلبك عليه وراها ....... راهي
وأنه الميت لو ألـﭽـح عيونك وراها .... أشوفهه
روحك وين ماتروح روحي وراها ....... خلفها
حس بيه يكفي صدك عليه



وشفاك

تگلي من حُبي فكيتك وشفاك ......... شفكيت
أنعليت منك ويمك دواي وشفاك ........ الشفاء
وصفتي آخذ بوسه من الخدين وشفاك ....... الشفه
ومن آخذ الوصفه يشفه كل مرض بيه



وسنك



مايهمني نبعك الراهي وسنك ........ عمرك
ولاتكشرلي بنيابك وسنك ........... السن
رمح سواك عاذل وسنك ......... سنترك
على گلبي ونبتك بيه


ﭽــانت أشواگي وياك جد ماظنيت وديه .... عاديه
وأدفعت لعيونك حياتي وعيوني وديه ..... الديه
وردت أحظنك بلهفه بروحي وديه ...... الأيد

ومن مديت أيديه ماردن ........ رجعن
وحرت ليش ماأجن وجواب ماردن ....... جابن
وأتضح شافن منك الويل وماردن ....... قاومن
وإنك بصدك گطعت كَلبي ويده